Sunday, November 11, 2012

പാതി മാഞ്ഞ ഒരു ഉടല്‍

പച്ച പുതച്ച് നില്‍ക്കുന്നു 
പാതി പൊളിഞ്ഞ വീട് 
കുഞ്ഞുങ്ങളോടുന്ന പോലെ 
പടരുന്നു വള്ളികള്‍.
കിടപ്പ്‌ മുറിയില്‍ ഒരാല്‍മരത്തൈ 
വേരാഴ്ത്തി നില്‍ക്കുന്നു.
ഓടിളകിയ തറയില്‍ 
പുല്ല്, പുല്‍ച്ചാടി. 

ചായമടര്‍ന്ന ചുവരുകളില്‍    
കുടിയിറക്കപ്പെട്ട 
കൂറകള്‍, ഉറുമ്പുകള്‍.
കാടിഴയുന്ന മുറ്റത്ത് 
പലര്‍, പലപ്പോഴായി 
വലിച്ചെറിഞ്ഞ വസ്തുക്കള്‍.

ഉടല്‍ പോയ മേല്‍ക്കൂരയില്‍ 
കാലം കൂട്ടിവയ്ക്കുന്നു 
നിലംതൊടാമണ്ണ്, അതിലും 
ആകാശത്തിന്റെ കണ്ണ്.

വാതിലുകളും ജനാലകളുമില്ലാത്ത 
മുറികളിലുറങ്ങുന്നു 
എല്ലാ നൊമ്പരങ്ങളുടെയും വെയില്‍.

പാതി പൊളിഞ്ഞ വീട് 
ഒരു തൊട്ടാവാടിച്ചെടി;
ഒന്ന് തൊട്ടതും 
ഓര്‍മ്മകളില്‍ വാടി നില്‍ക്കുന്നു. 

പാതി പൊളിഞ്ഞ വീട് 
ഒരു ചിതല്‍പ്പുറ്റ്,
തുടുമിന്നല്‍പ്പിണരിലും 
ധ്യാനം തുടരുന്നു; ഏത് 
മഴയും നനഞ്ഞ് നില്‍ക്കുന്നു.

പാതിരാവില്‍ 
പാതി പൊളിഞ്ഞ വീട്ടില്‍ 
തിളങ്ങുന്നു 
ചാക്കില്‍ കെട്ടിയാരോ 
വലിച്ചെറിഞ്ഞ പൂച്ചയുടെ 
ഇളംപച്ചക്കണ്ണുകള്‍. 

10 comments:

  1. അവസാന വരികള്‍ നന്നായി. ഇടഭാഗത്ത് ഒട്ടും ഒതുക്കം തോന്നിയതുമില്ല

    ReplyDelete
  2. കടവാവലുകള്‍ക്ക് ഇഷ്ടമായ ഒരിടം ചുടലവരെ വള്ളിപ്പടര്‍പ്പില്‍ കുരുങ്ങിക്കിടക്കും

    നന്നായി എഴുതി
    ആശംസകള്‍

    ReplyDelete
  3. ദയനീയമായൊരു ചിത്രം......
    ആശംസകള്‍

    ReplyDelete
  4. നല്ല ഒതുക്കമുള്ള വരികള്‍. വായനക്ക് സുഖം. അഭിനന്ദനങ്ങള്‍

    ReplyDelete
  5. ജീര്‍ണതയുടെ ,എകാന്തതയുടെ വാങ്മയചിത്രം ....ഭാവുകങ്ങള്‍

    ReplyDelete
  6. വീട് പുതുക്കിപ്പണിയും വരെയും വിശ്രമമില്ലിനിമേല്‍

    ReplyDelete
  7. നല്ല ബിംബങ്ങളുടെ ധാരാളിത്തം. തീവ്രമായ ചില വാങ്മയചിത്രങ്ങള്‍. നന്നായി.

    ReplyDelete